السلام عليكم ورحمة الله وبركاتة..
واعتصموا بحبل الله جميعا ولا تفرقوا
يارب انصر مصر واحميها يارب
دلوقتى فى شباب وبنات نزلوا التحرير ونزلوا فى كل حتة فى مصر.. طبعا دى مبقتش مظاهرات وبس .. دى فعلا اخدت شكل الثورة .. لانها بقت ضد اصلاح الحكم وقبول اى كلمة من الحكام.. واحنا دلوقتى فى يومها الـ 18
فى ناس مش قادرة تنزل .. ولو انت مش قادر تنزل متزعلش ومتقولش ان كان نفسك تشارك.. تقدر تشارك فى الثورة وانت مش فى الشارع .. دا انا بقول تعمل كدا لو فعلا ظروفك مش هتنفع تخليك تنزل خاااالص
اقوولك تعمل ايه...
اولاً: ادعى كتير طول الوقت ان ربنا يحمى مصر ويحمى شبابها وقوم اتوضى وصلى ركعتين لله كل شوية علشان ربنا ينصرها .. اللى فى الشارع مش هيعرفوا يصلوا .. صلى انت بدالهم وادعى ربنا يحميهم ويحميها ويزيل الغمة دى بخير.
ثانياً: اتكلم مع اصحابك اللى مش فاهمين او مش مقتنعين او اللى عايزين الحكاية تخلص والسلام علشان الحياه ترجع لطبيعتها .. مش مهم هى هترجع عاملة ازاى.. حاول تعرفهم ان عيوب الحكومة دى لو مكانتش أذتة بشكل مباشر فهى بتأذية بشكل غير مباشر.. ومينفعش يقول نفسى نفسى .. فهمة انه على الاقل لو مش هينزل المظاهرات ميبقاش ضدها.. لان اخواتنا اللى التحرير مالجأوش للعنف ولا أذوا البلد واكتر حاجة بتتعبهم ان الناس ممكن تبقى ضدهم او يدعوا عليهم.. فهمهم ان الشهداء دول ماماتوش من فراغ .. وان استمرار الرئيس حسنى مبارك فى الحكم للكام شهر الباقيين هيأذى البلد اكتر واكتر .. وربنا يستر علينا يارب... ويمكن واحد يقتنع وتلاقية هو نزل بدالك واخد معاه 5 او 6 من اصحابة ..
ثالثا: لو تعرف حد نازل اديله 5 ولا 10 ولا 20 جنية اى مبلغ تقدر تديهولة وهو نازل .. لانهم هناك بيلموا فلوس من بعض علشان يشتروا اسعافات اولية وحاجات طبيه واكل وعصائر ليهم .. ادى لصحابك الفلوس دى وخلية يشارك بيهم فى اى حاجة هما محتاجينها هناك.. الناس هناك بيمشوا بكيس يلموا فلوس ويجيبوا اكل للى دفع 50 قرش واللى دفع 50 جنيه واللى مدفعش خالص كلة بالتساوى من غير مايحاسبوا بعض.. تقدر تشارك معاهم.. دا غير انك تقدر تشارك ببطانية او بلوفر فى المطرة او خيمة من اللى ممكن يبنوها ويتداروا فيها.. شاركهم بأى حاجة
رابعاً: لو انت بره مصر ... خليك مثال رائع للى حواليك ... فهمهم ابعاد الموضوع وهما اكيد فاهمين .. عرفهم اننا رافضين اى تدخل اجنبى .. واننا قادرين نجيب حقنا بنفسنا... واننا بنحارب الظلم والفساد اللى صبرنا عليه كتير ع امل انه هيتغير... خليك مصرى بجد اى حد يشوفه يتمنى انه يبقى مصرى زية.
خامساً: خليك ايجابى وانشر ع النت كل المعلومات الابجابية اللى انت متأكد منها ..ماتنشرش حاجة سلبية انت مش متأكد منها .. لكن لو اتأكدت .. انشرها طبعا ... أقرا فى الدستور كويس وافهمة .. ابدأ افهم مين اللى ممكن يترشح للرئاسة وافهم فى السياسة ... اعرف اللى ليك واللى عليك.. ماتشتمش .. ماتغلطش.. اعرف ايه ابعاد اتفاقية كامب ديفيد واتفاقيتنا مع كل دول العالم... اقرا فى علاقة الدين بالسياسة وكل اما تلاقى معلومة مفيدة .. انشرها وشارك اللى انت عرفتة مع غيرك.
واخيرا: هقولكوا بردة عليكم بالدعاء .. واوعوا نتفكك او يعرفوا يقسمونا وينشروا بيننا الفتنة
وربنا ينجى مصر يارب ان شاء الله ويحميها يارب
No comments:
Post a Comment